Tjónið vegna áfengisneyslu leggst á allt samfélagið. Áfengisdrykkja er því ekki einkamál neytandans. Ábyrgð hans er þess vegna mikil.

Áfengi veldur samfélaginu miklu meiri skaða en nokkurt annað vímuefni. Kostnaður vegna umferðarslysa, ótímabærra dauðsfalla, sjúkdóma og ofbeldisverka sem rekja má til áfengis hleypur á háum fjárhæðum. Akstur undir áhrifum áfengis eða annarra vímuefna er ein af tveimur algengustu orsökum banaslysa í umferðinni. Auk þess verða margir fyrir alvarlegu heilsutjóni, jafnvel ævarandi örorku, vegna ölvunaraksturs.

Efnahagsleg áhrif umferðarslysa eru gífurleg, en talið er að um 1–5% af vergri þjóðarframleiðslu ríkja heims glatist vegna umferðarslysa. Eru þá ótalin öll þau félagslegu og tilfinningalegu áhrif sem slysin hafa í samfélaginu. Árin 2012–2017 nam kostnaður vegna umferðarslysa hér á landi að jafnaði 42,8 milljörðum króna á ári hverju. Þetta er svimandi há tala. Rannsóknir sýna að kostnaðurinn við hvert banaslys í umferðinni getur numið hundruðum milljóna króna og alvarlegt slys tugum milljóna.

Umferðarslys eru samt ekki bara spurning um peninga. Líf fólks og heilsa er líka í húfi. Í hverju dauðsfalli eða alvarlegu óhappi felst mannlegur harmleikur. Ökumaðurinn er ekki einungis ábyrgur gagnvart sjálfum sér; aðrir vegfarendur, akandi, hjólandi og gangandi, verða að treysta á að ökumaðurinn sé í ökuhæfu ástandi. Af þessum ástæðum öllum eru umferðaröryggismál svo mikilvæg.

Á árunum 2002–2006 létust að jafnaði 25 manns á ári í umferðarslysum hér á landi en næstu fimm ár þar á eftir (2007–2011) létust að jafnaði tæplega 13 manns á ári. Á árunum 2012–2017 létust svo að jafnaði rúmlega 12 manns á ári hverju. Árin 2002–2006 slösuðust að jafnaði 141 alvarlega í umferðinni en árin 2007–2011 var þessi tala komin í 185 manns. Á árunum 2012–2017 slösuðust að jafnaði tæplega 179 manns alvarlega á ári hverju.