Á meðgöngu og á meðan brjóstagjöf stendur ættu konur alls ekki að neyta áfengis. Blóðkerfi barns og móður er samtengt og áfengi á því auðvelda leið í gegnum fylgju og naflastreng. Líffæri barnsins eru ekki nægilega þroskuð til að brjóta áfengið niður og barnið verður þar af leiðandi fyrir meiri áhrifum en móðirin.
Það þykir allvel sannað að áfengisneysla á meðgöngu getur haft alverleg skaðleg áhrif á fóstrið og leiði til fæðingargalla. Ef kona drekkur þegar hún er barnshafandi getur það valdið skaða sem er allt frá vægum hegðunarvanda sem kemur fyrst fram á unglingsaldri til mikilla skaða á útliti og vitsmunum. Alvarlegustu skemmdirnar eru nefndar áfengisheilkenni (Fetal Alcohol syndrome) þá fer saman, minnkaður vöxtur, lítill heili, gat milli gátta hjartans, stutt augnrifa og vanþróaðir kjálkar.
Fóstrið er mjög misnæmt fyrir eituráhrifum og fer það eftir því á hvaða tímabili áfengið fær að virka. Hætta er mest á 3.-9. viku fósturþroska.
Á fyrstu þremur vikunum er fóstrið það lítið þroskað að skemmdirnar sem verða eru annað hvort það miklar að fóstrið deyr eða þá að ef fóstrið lifir nær það sér. Hættan er mest á vanskapnaði á 4.-5. viku meðgöngu því að þá eru líffærin að myndast.
Eftir það dregur úr hættunni. Eftir 9. viku eru líffærin fullsköpuð flest og ekki eins viðkvæm. Heili fóstursins er þó næmur fyrir áfengisneyslunni alla meðgönguna
Ef móðir neytir áfengis með barn á brjósti fær barnið hluta af áfenginu með brjóstamjólkinni og verður þar af leiðandi fyrir áfengisáhrifum. Þau tengsl sem myndast milli móður og barns geta einnig brenglast þar sem áfengisdrykkja getur dregið úr mjólkurframleiðslu, mjólkin breytir um lykt og bragð og getur því orðið ógeðfelld fyrir barnið.
- Hjá konum sem drekka áfengi óhóflega er aukin hætta á brjóstakrabbameini.
- Kona sem drekkur sama magn af áfengi og karl verður drukknari en hann.
- Mikil áfengisneysla getur flýtt fyrir breytingaskeiðinu
- Barnsins vegna á engin áfengisneysla að vera á meðgöngu og á meðan á brjóstagjöf stendur.
