Hjá Alþjóðaheilbrigðismálastofnuninni liggja fyrir upplýsingar um að allt að fjórðungur dauðsfalla fólks á aldrinum 15-29 ára í Evrópu séu beinar afleiðingar áfengisneyslu, svo sem vegna umferðarslysa, eitrana, sjálfsvíga og morða. Sérfræðingar benda einnig á að vaxandi kröfur samfélagsins komi illa við margar fjölskyldur. Mörg ungmenni líða fyrir neikvæða sjálfsmynd og vanmetakennd. Við þær aðstæður hefur áfengisdrykkja sterkari hljómgrunn meðal ungmenna.

Þrátt fyrir að dregið hafi úr áfengisneyslu íslenskra ungmenna er áfengisneysla fólks á aldrinum 17-25 ára algeng. Samkvæmt rannsóknum hefur hlutfall unglinga í 10. bekk, sem drekka ekki áfengi, hækkað mikið á undanförnum áratugum. Þessi þróun er reyndar alls ekki einskorðuð við Ísland heldur sést víða annars staðar. Áfengisneysla unglinga hefur ekki aðeins breyst þannig að þeim sem aldrei hafa bragðað áfengi hafi fjölgað, heldur hefur þeim sem hafa mjög oft drukkið áfengi fækkað mjög.

Áfengisneyslan hefur líka minnkað í aldurshópnum 16-20 ára, en er samt talsvert meiri en í grunnskólanum og hækkar jafnt og þétt fram yfir tvítugt. Íslensk ungmenni eru sem sagt flest að byrja að drekka og aka bíl á sama tíma. Í ljósi þess að þau hafa takmarkaða reynslu af hvorutveggja er full ástæða til þess að fara varlega.