Ef litið er til dagsins í dag hafa um 90% íbúa í vestrænum þjóðfélögum og eru eldri en 18 ára einhvern tímann drukkið áfengi. Um 10% íbúanna drekka um helming alls áfengis á hverjum tíma. Ástæða þykir að hafa sérstök lög um sölu, dreifingu og framleiðslu áfengis þar sem allir drykkir sem innihalda meira magn af áfengi en 2,25% eru skilgreindir sem áfengi. Á Íslandi eru nú 22% líkur fyrir karla og 10 % líkur fyrir konur að verða vímuefnafíklar einhvern tíma á ævinni og í 80 % tilvika er vímuefnaröskunin fyrst og fremst áfengissýki. Fylgni er á milli fíknar og ýmissa annarra sjúkdóma. Fíknsjúkdómar hafa mjög alvarlegar afleiðingar og skaða bæði þann sem fíkninni er haldinn, fjölskylduna og samfélagið allt.

Samkvæmt upplýsingum Alþjóða heilbrigðismálastofnunarinnar (WHO) er áfengisneysla í heiminum mest í Evrópu og dauðsföllum, sem rekja má til áfengis fer fjölgandi. Áætlað er að rekja megi orsök um þriggja milljóna dauðsfalla til áfengisneyslu eða 5,3% af dauðsföllum í heiminum. Í aldurshópnum 20-39 ára eru 13,5% dauðsfalla rakin til neyslu áfengis.

Áfengi getur valdið líkamlegum, andlegum og félagslegum skaða vegna eituráhrifa á líkamann, vímu og fíknar. Meginskýringin á samfélagslegu tjóni af völdum áfengis er vegna vímunnar sem hefur í för með sér ofbeldi, umferðarslys og önnur slys.

Árið 2018 var áfengi í þriðja sæti af 27 helstu áhættuþáttum sem orsök dauðsfalla og sjúkdóma í heiminum, samkvæmt upplýsingum Alþjóða heilbrigðismálastofnunarinnar, en alls er talið að áfengi hafi áhrif á allt að 200 skilgreinda sjúkdóma og heilbrigðisvandamál. Áfengisneysla er til dæmis talin auka líkur á ýmsum tegundum krabbameins og getur valdið ýmiss konar skemmdum í heila og taugum.