Í aðalatriðum má skipta leiðum til þess að hafa áhrif á neyslu áfengis í tvennt. Mörkin á milli þessara tveggja leiða eru þó ekki alltaf skýr. Annars vegar eru leiðir sem snúa að aðgengi að áfengi, það er að segja hversu auðvelt það er að kaupa og verða sér úti um áfengi. Auðvelt aðgengi virðist bæði hafa áhrif á hversu mikið fólk drekkur almennt og líkurnar á að það aki ölvað. Tengslin eru þau að auðveldara og meira aðgengi leiðir til aukinnar neyslu og auknum líkum á að fólk aki ölvað.

Hins vegar eru leiðir sem hafa áhrif á eftirspurn eftir áfengi eða áhugann á að neyta þess. Þar koma til dæmis áfengisauglýsingar við sögu. Auglýsingar sem draga upp einhliða fegraða mynd af neyslu áfengis en upplýsa ekkert um mögulega skaðsemi þess auka áhugann á að nota það. Á hinn bóginn er líklegt að þekking á áhættunni sem kann að fylgja neyslunni dragi úr áhuganum. Það gæti til dæmis átt við þekkingu á áhrifum áfengis á ökuhæfni og hættuna á sektum eða ökuleyfissviptingu, slæm áhrif áfengis á fóstur í móðurkviði, tengsl áfengis og sjúkdóma, til dæmis krabbameina, og fíkniáhætta.

Undir aðgengi fellur meðal annars verð á áfengi; lágt verð auðveldar áfengiskaup. Dreifingarfyrirkomulag skiptir hér líka máli, það er hvort hægt er að kaupa áfengi nánast hvar sem er, eða hvort það er bundið við ákveðnar verslanir eins og gert er hér á landi. Á Íslandi má einungis kaupa áfengi í smásölu í Vínbúðum Áfengis- og tóbaksverslunarinnar. Það er álit sérfræðinga að netverslun sé því ólögleg í hvaða formi sem hún er sett upp.

Aldursmörk til áfengiskaupa eru einnig meðal þeirra þátta sem hafa áhrif á aðgengi að áfengi. Eftir því sem þau eru hærri er erfiðara fyrir börn og ungmenni að kaupa sér áfengi.