Rannsóknir sýna að skýrar reglur um ölvunarakstur hafa jákvæð áhrif, þær draga úr líkum á ölvunarakstri. Rannsóknir á áhrifum þess að lækka leyfileg mörk um vínandamagn í blóði eru skýrt dæmi um það. Þar sem slíkar breytingar hafa verið gerðar hefur dregið úr ölvunartengdum umferðarslysum. Það styrkir þessar reglur að hafa ströng viðurlög séu þær brotnar, enda alvarlegt að stofna lífi og heilsu fólks í hættu með ölvunarakstri. Það virðist líka hafa jákvæð áhrif að hafa virkt eftirlit með ölvunarakstri, til dæmis með því að lögregla stöðvi ökumenn til þess að kanna hvort þeir eru undir áhrifum.

Í sumum ríkjum hafa verið umræður um að setja sérstakan búnað, ölvunarlás, til þess að koma í veg fyrir að ölvaðir ökumenn geti sett bíla sína í gang. Það hefur til dæmis verið til umræðu í Danmörku að þeir sem hafa verið dæmdir fyrir ölvunarakstur skuli sæta því að ölvunarlás verði settur í bíl þeirra. Lásinn metur hvort vínandi sé í blóði bílstjórans, áður en hann hleypir bílnum í gang. Svipuð umræða hefur verið í Svíþjóð.

Fræðsla um áhættu ölvunaraksturs og áróður fyrir því að aka aldrei undir áhrifum áfengis og annarra vímuefna er talsverð á Íslandi. Með því er bæði verið að höfða til ábyrgðar okkar sem ökumanna en einnig til okkar sem ábyrgra borgara. Ábyrgur borgari gerir allt sem hann getur til þess að koma í veg fyrir ölvunarakstur. Með því tökum við öll þátt í að koma í veg fyrir hugsanleg umferðarslys og getum bjargað mannslífum.